Sabah Tomoimo Misokodung Miampai Polinta Pisompuuvan

KOTA KINABALU: Kakaal ih Vozoon Montili, Datuk Seri Mohd Shafie Apdal, miampai doun sondii montok tumihombus miampai do Kopolintaan Pisompuuvan (G2G) id ahal ponguhudan (pentadbiran) pomogunan Malaysia diti.

Ka disido, nokosunud noh disido oh ahal nokomoi kuminaa doid di Huguan Montili, Tan Sri Muhyiddin Yassin, do tomoimo oh kopolintaan Sabah, poingukab montok misokodung, montok kounalan do pomogunan diti.

Minoboos isido do pisokodungan G2G diho nopo nga okon ko miaga do ih buzuon pulitik tu pisuvazan pombii’an pulitik mositi hiadon poingisanon montok kotihombusan kotundaan.

“Nokoboos zou noh do pulitik nopo nga poinsuvai om mositi tokou do pobibion iho. Kosondii’an pulitik ku montok sasatanga ahal om prinsip mimang do misuvai.

“Nga montok monuidong do iso pomogunan, mositi do misokodung tokou, kiguno montok dotokou do momohodi kozuuzuvo poimatu di tavasi.

“Id ahal kotundaan pomogunan diti, miaga poh toi doid kogompitan do Sabah, mositi kivaa pisaan id piahatan do kopolintaan Pisompuuvan om Pogun.

“Mositi tokou do misokodung doid tiso om tiso id suang iso pomogunan di isooi,” ka disido di ontok pinokianu mongomi kokomoi boos di Muhyiddin, kogompit pisokodungan id piahatan do kopolintaan Sabah om Pisompuuvan.

Noboos disido iti di kahapas Abaabazan Panaandakan Tadau Kabansaan nazatan pogun Sabah 2020, doiti di koniab.

Id kinotombuhuzan di Huguan Montili id Sabah, di TadauKoonom, pinopoimbuhai ih Muhyiddin, kopononsohan disido tu au misoumpo oh Sabah, miampai do kopolintaan Pisompuuvan.

Minoboos ih Muhyiddin, do hobi vinasi nung kaanu oh kopolintaan pogun do misokodung sabaagi iso tinimungan miampai do kopolintaan Pisompuuvan.