Pongkimamaan Borneo Today Popoingkavas Boos Kadazan Nakaanu Koponoimaan Tavasi

JENNIFER TUGUNG MICHAEL

KOTA KINABALU:  Kinopomouangan boogizan Boos Kadazan id kapabalan Borneo Today di kavavagu diti nakahantoi minamagazat pongintangan Puu Dewan Koundangan Pogun (ADUN), Jenifer Lasimbang.

Jenifer i nogi Panakadai Montili Balajalan om Inovasi Sabah, mongomi kinopomouangan hivan abal id suang boos Kadazan id boogizan diti sabaagi kaandak montok mogiigizon Kadazan mooi kotihombus boos dioho.

“Monongkotohuod zou kozo montok hansanon mogiigizon Kadazan tu Borneo Today minaganu pongkimamaan montok minonuidong boogizan Boos Kadazan id hivang dioho.

“Iti nopo nga iso angkab om kaandak mogiigizon (Kadazan) id nombo kogumuan boos gunoon dotokou id lahan pibaasan om sinuatan,” ka disido.

Minoboos isido dino kahapas pinopoimagon Lamai Kopotunuzan Komputer kuminaa Kuut Anak Negeri Penampang, di baino.

Minoboos i Jenifer, timpu digital baino nokoponguhan vagu kopointahangan abal id nombo media cetak okon nodii ko i’iso no sandad kopoihaan.

Pinopointahang isido, miampai kinopomouangan hivang boos Kadazan id boogizan diti, tuhun ginumuan kaanu mambasa om minsingiho boos tungkus diti miampai au monutul vohit.

“Mogiigizon Kadazan i poingizon id Amerika Syarikat nga kaanu mambasa abal Kadazan id lahan internet, Kadazan i mogiigizon id Australia nga kaanu mambasa miaga abal kokomoi kinopongukaban mahik Tomu Donggongon.

“Tokou i id timpu digital diti, ino no kahansanan dotokou mooi tuhun ginumuan kaanu mambasa abal Kadazan om minsingiho boos diti au monutul id nombo nopo izioho,” ka disido.

Suvai mantad dino, humansan isido huguan ngaavi adat id pogun diti kaanu papanau tonggungan montok mongunsub sinakagon tomuhok montok monuat miampai minsingiho boos Kadazan id suang koposizon potitikid tadau dioho.