PCS Tinuidong Montok Pamabak Undi KDM

KENINGAU: Naib Polosiden Parti Warisan Sabah(Warisan) Datuk Peter Anthony minamadawa kinoimbuhazan do Parti Cinta Sabah PCS)sabaagi iso mantad taktik boogizan havan montok mamabak undi id suang tinimungan mamasok hoohobi no kozo Kadazan Dusun Murut KDM.

Pinopointahang isido parti dino i hinuguan Datuk Seri Anifah Aman nopo nga sabaagi ejen pinouang kumaa parti havan id Sabah.

“Nga otumbazaan zou tuhun KDM baino kitoihaan nodii ngavi, nung tuhun KDM kivaa hahansanon layat dioho i bongkok aiso hoogo, hoohobi no kozo mongungundi ngaavi id Bingkor.

“Mantad dino otumbazaan zou dioho diti momihi noonombo parti i tootopot popobuu hak ngaavi tuhun Sabah om parti kinoizonon dino, ino otumbazaan zou,” ka disido i nasamanan kahapas Lamai Tosuau Layat Layat id Bingkor, Keningau di Tadau Koonom.

Kokomoi di poingkakaton, minoboos i Peter, isido om buuan parti ngaavi id siibo Pakatan Harapan moguhud ngaan poingkakaton montok koponimbangan Polisiden Warisan, Datuk Seri Mohd. Shafie Apdal.

“Id nazatan poingkakaton vagu tokou tootopot nopo nga papatod tokou ngaan, mantad po toi Warisan, PKR, UPKO om DAP om potontuon ino di Vozoon Montili.

“Nga onu i koindau tokou om poingkakaton nopo nga izioho di aiso ‘gene’ mantad bongkok diti.
“Intangan tokou izioho diti osuau mogiigizon, kikointutunan di tavasi om au intangan mantad po toi izioho diti muslim, Kristian toi ko Buddha, tu ino okon ko poguntaban, tukuan montok mingkakat id uvang tu izikoi saviavi miaga nizonon, ” ka disido.

Ka vagu disido, parti havan baino noindamaan noovian toihaan tu potitikid timpu popogompit ahal ngaavi novunos miaga ahal kotinouvan, agama om ahal modiidikot aiso kasagaan.