Nakataak ku no tanda katapatan kumaa pulis om mokianu tumuubung SPRM

KOTA KINABALU: Puu Dewan Koundangan Pogun (ADUN) Moyog, Jenifer Lasimbang pinopointahang luputan pulis i tinoodo disido poguhui diti kouha no tu pinopoompit kikoulaho kahasaan tavagat.

Minoboos isido, tanda katapatan i kivaa id disido kokomoi duvo kusai i mokianu disido sumimban parti nakataak kumaa pulis om mokianu boogizan kikuasa tumuubung Suruhanjaya Panahaban Susuap Malaysia montok haang sumusuut dino.

“Nokopomoodo zou no luputan pulis. Vookon suang luputan nopo nga montok mokianu pulis monoodo koponoizukan kumaa tuhun ngaavi i monoodo pambalazan, miampai saksi om tanda katapatan di kivaa.

“Mokianu zou nogi boogizan pulis montok mongintong kumaa agensi ngaavi suvai miaga SPRM montok haang sumusuut dino, koponoizukan kiis miaga diti kivaa koulalaho kahasaan tavagat om id siibo kuasa pulis,” ka disido.

Pinopointahang isido kointahangan SPRM di baino i minamadawa nokotuubung hahansanon layat polinta Sabah i minamadawa minonoimo pambalazan sumimban parti, nga au minonoodo luputan kumaa SPRM.

Ontok di ko 23 Vuhan Kotuu nakatahib, minonoodo i Jenifer luputan dino id Hongkod Upis Pulis Uvang Penampang (IPD) Penampang kahapas duvo kusai kikotumbazaan ejen pulitik nokoikot id nizonon disido sangadau poguhui dino.

Duuduvo kusai dino noboos mokianu sumimban parti om nodondian pambalazan nakatantu.

Kointahangan SPRM di koniab sundung i do ingkaa pinabaahing do boogizan havan kaaka dino au izioho minonoodo luputan pulis au minonoodo luputan pulis tanda totondos dino montok momoduung no.

Sundung i do ingkaa, pinamazazapan Dewan Koundangan Pogun (DUN) Sabah songkoniab pinopokito kokitanan tootopot buuan i suminimban parti montok mongintong polinta Parti Warisan Sabah (Warisan) aatu.

Kogumuan buuan dino poguhui diti minangakun noonuan nogi pihi pambalazan montok sumimban, nga kaaka dino au toomod izioho aahung tu ohuduk miampai Warisan.