INANAM: Pomilian Tagayo Pogun Sabah ontok koompokon minggu diti sotopot do iso’ timpu di tosonong montok di tongo’ mongungundi’ ngaawi’ do monulak pomusarahan UMNO om i tongo’ mononokodung diolo’ i momolohou rayat Pogun Id Siriba Tongus diti sabaagi ‘palui’.
“Miampai ginawo di tolidang, magangat oku kumaa tokou ngaawi’ sontob mongungundi’ om rayat Sabah montok manahak diolo’ mesej di pointalang do yati’ nopo diti okon ko palui. Yati’ diti haro maruah, yati’ nopo diti koponongkiala’ diolo’ om lobi nogi’ kosonong mantad diolo’.
Kada’ no undio yolo, kanou sokodungo’ om undio tokou diti Warisan Plus,” ka di Albert Bingkasan.
Luguan Kointalangan UPKO dilo’ nokopuriman do ‘otogod kopio, tigiran om nosindualan’ sabap kalalansanon UMNO dilo’ kasaga’ do momolohou rayat Sabah sabaagi do ‘palui’.
“Totopot do nunu i binoros diolo’ dilo’ sotopot di kointalangan di kawawagu id kokomoi do mindset diolo’. Iri po nogi’ do UPKO miagal numaan bubuduho’ id masaan do kakal po yolo’ miampai Barisan Nasional.
“UPKO kakal po do haro sabap do otumbayaan yahai kumaa kualiti haro kosuulon nung piagalon do kuantiti. Ogumu’ po nogi’ kinosigompoton do UPKO nga’ koinsanai dilo’ okon i ko’ korikot do tinsan insan. Bobos tokou kumaraja’ gisom do mokiinsian tokou moi do koindalan tinonggungan Putrajaya montok kopotundaan pogun Sabah.
“Pounsikou kumaa di Datuk Seri Najib Razak sabap do minongukab pekung id kangkab. Kalalansanon Putrajaya i kaagal dilo’ amu’ no kosudong do sokodungon. Ilo’ nokoinsodu’ tomod miampai aspirasi Pibatosan Malaysia 1963 (MA63). Kororongodo’ miagal dilo’ ponokotanda’ do yolo’ no i lobi palui.
“Mindset miagal dilo’ no i pinopokito lobi 60 pihatus mongungundi tumogod gisom do naala’ BN ontok di toun 2018. Ula-ula no do poinggonggom diolo’, montok di minaganu tokou do laang montok tumanud kumaa ginawo rayat om iri no minaganu yahai laang do suminoliwan mantad BN,” ka disio id rolou kakal tigiran.
Babas Monuunurat Pulitik kumaa di Kumoduo Boyoon Montiri, i Datuk Seri Panglima Wilfred Madius Tangau dilo’ minoboros ontok pinokianu do moboros id kimpin disio id Kg Binaung om Kg Bantayan hiti di kosodop miampai di calun mantad Parti Keadilan Rakyat, i Peto Galim i mongongobi’ parti porinta’ montok DUN Inanam.
Ka di Bingkasan, “Otopot, iti timpu do kimpin, nunu nopo nga’ milo do sumili. Nga’ iti mo timpu di tosudong montok mintong om momusorou kaagu iso’ iso’ parti om kalalansanon diolo’. I Datuk Najib momolohou dati’ sabaagi do palui. Otopot do palui tokou sokiro do kakal tokou po do sumokodung diti Barisan Nasional, Perikatan Nasional, UMNO om koinsanai di tongo’ mononokodung diolo’. “Yati’ okon ko palui, kada’ tokou undio iyolo’.
Piipiro tadau nakatalib, i bagas Luguan Montiri i Najib id saaalom iso’ panambarasan disio id Sepanggar minoboros do “Nung amu’ mongundi BN palui”. Okito po nogi’ id rakaman video diolo’ i nokotikid id media sosiol, calon BN i poinggaha do mingirak soira’ do noroitan boros “palui” dilo’.
Palui, patod boros mantad Sabah dilo’ kirati do songulun dilo’ sabaagi tolol, toi ko’ lobi buduh mantad songulun dit buduh. PRN Sabah ko-16 pikiikiro do koindalan ontok ko 26tw Kosiam diti.
