Mogiigizon kampung KDM mongudizo kapanaakan IMM13

Gambal pananapod

KOTA KINABALU: Atag Komontilian Suang Pogun montok papaadang mogisusuvai kavo kointutunan i nosinganu do modiidikot aiso kasagaan id Sabah kumaa iso kointutunan IMM13)nakaanu sisimba di topodos mantad piipio mogiigizon kampung KDMR i poingizon id uvang mogisusuvai id Sabah.

Katangaban dioho nontodonon mantad pogudizaan kokomoi dati kantakan di koimbuhai nung abaabazan dino todoon.

Tumanud di Ruddie Aloi, 54, mantad Kampung Gana, Kota Marudu, au isido kalati nookuo saviavi Polinta Pogun nokosoguhu au insan poguzazang poingingit IMM13 songian nopupusan pisangadan piwolisan id Philippine.

Ruddie Aloi

“Koiho zou Polinta Pogun poguhui diti moguzazang modiidikot aiso kasagaan nga papasaga izioho di poingingit IMM13 montok mizon tuutulus id Sabah.

Om miaga kozo ngapadan ngoibu mongingit IMM13 aiso kobohingkangan kumaa dagai, polinta pogun poguhui diti pinapahabus ngotusan ngoibu vagu Kad Burung- Burung om Sijil Banci kumaa PTI id Sabah.

Miaga di noboos do saviavi parti politik id Sabah, Polinta Hongkod mositi papaatod mahik saviavi mongingit IMM13, Kad Burung-Burung om Sijil Banci gumuhi kumaa Philippine.

Sundung i do ingkaa, mongingit Kad Burung-burung om Sijil Banci nopo nga PTI om montok mongingit IMM13, pisangadan piwolisan id Koibutan Philippine nopupusan.

Onuan nopo izioho koompunan mooi kaanu izioho gumuhi id lahan tumanud kaandak,” ka disido.

Au nogi isido nokokito guno dino papahabus IMM13 montok moguhud modiidikot aiso kasagaan id Sabah miaga di naatag di Montili Suang Pogun, Datuk Seri Hamzah Zainuddin.

“Osoou ku angkab dino nopo nga montok moguhud modiidikot aiso kasagaan id Sabah miampai popotood onu nopo suat di kivaa nga nokuo mositi manaak dioho suat di komozon montok nouzazang?”

Gullih @Michael Asin

Montok di Gullih @ Michael Asin, 63 mantad Papar, kitangazan isido pogudizaan i kopigompit nopo nga mantad po toi polinta Manila mangakun om monoimo IMM13 i pinahabus montok okon nouzazang id Sabah do Polinta Hongkod.

“Tumongob zou Manila monoimo tuhun ngaavi diti (mongingit IMM13)tu polinta pogun om hongkod poguhui diti au insan ponoodo do nuununu di totuhid om i noindamaan kozo, minanaak izioho Kad Burung Burung om sijil Banci kumaa ngotusan ngoibu modiidikot aiso kasagaan.

Soovo no, ontok manaak tokou kad Burung Burung toi ko sijil banci kumaa modiidikot aiso kasagaan diti, iti tootopot nopo kopokito dotokou monoimo dioho montok mizon om pakalaja id doiti nga miampai aiso hak montok mongupalai dumadi monompogunan.

Nung au tokou insan mimang tuhun ngaavi diti mikot id Sabah, au tokou manaak dioho Kad Burung Burung toi ko sijil Banci om popohogos dioho sampapanau id Pogun Sabah miampai misosondi nga id sambahik dino manaan om moguzazang dioho miampai tosisikap.

Osoou ku i apatut todoon do polinta hongkod nopo nga koiso kozo, pibaasan miampai polinta pogun kokomoi poingkuo mongintong mooi Manila monoimo mongingit IMM13 di kivaa no haid diti om ahapas dino, mogium lahan monguhan kad Burung Burung om Sijil Banci.

Papaatod mahik 40,000 mongingit Kad Burung Burung om Sijil Banci do untobon tadau dioho id Sabah, ” ka disido.

Mohd Shah Bin Haji Mohd Shaid

Naamot dino, Mohd Shah Bin Haji Mohd Shaid, 35, mantad Beaufort nakaakun miampai Polosiden Parti Kerjasama Anak Negeri, Henrynus Amin do kapanaakan kointutunan nouzazang kumaa okon mongingit IMM13 nopo nga iso di au toomod nakatanud undang-undang imigresen Malaysia.

“Kahasa toomod montok papahabus IMM13 kumaa okon nouzazang id Sabah tu izioho au nakatanud kootulan montok koonuan dino.

Au tokou kavasa poposuang dioho mongingit Kad Burung Burung om Sijil Banci diti sabaagi nouzazang om manaak dioho IMM13 tu izioho okon (nouzazang) om moboos tokou kokomoi ngotusan ngoibu tuhun id doiti.

Au dati monoimo Manila kapatadan mahik mongingit Kad Burung Burung om Sijil Banci diti i poinsuang sabaagi nouzazang.

Om touvi no dino tokou kivaa ngotusan ngoibu tuhun modiidikot aiso kasagaan i sampapanau id pototongkop Sabah miampai poingingit IMM13 di pointopot om iti adadi kobohingkangan kumaa dotokou,“ ka disido.

Naamot dino, Monozibut Tagazo Parti Warisan Sabah, Terence Siambun minonuat id Facebook disido kokomoi Polosiden STAR Sabah, Jeffrey Kitingan i binoos monokodung poimponu miampai kotontuan Komontilian Suang Pogun montok papahabus IMM13 kumaa mongingit Kad Burung Burung om Sijil Banci.

Gambal pananapod.

Id sinuatan disido, minoboos i Siambun do Montili Suang Pogun, Hamzah Zainuddin touvi no dino pinopoimagon do sundung tu tinimungan i aiso koponompogunan, id Sabah aiso kopotutan kaanu koponompogunan, pointatap polinta papahabus suat kointutunan kumaa dioho om KDN kiangkab papaadang saviavi modiidikot aiso kasagaan id Sabah.

Pinopointahang nogi isido do au insan i Hamzah poboos nuununu id Parlimen kokomoi kopokionuan di tinoodo do blogger STAR do kapanaakan IMM13 kumaa mongingit Kad Burung Burung om Sijil Banci tootopot nopo nga kiangkab montok papaatod mahik modiidikot aiso kasagaan id Sabah om minoboos do Anifah Aman nga pinopoboos katangaban disido kumaa atag dino.

Pinopoiho i Siambun do ino atahang nodii do kotontuan Komontilian Suang Pogun baino aiso pisuvazan miampai PSS i hinavan di Jeffrey ontok timpuunon toun diti om minudizo songian isido (Jeffrey)mangazu do ‘Black Sunday’ montok au kaakun kotontuan di tinoodo di Hamzah.