“Lalansanon Mogiigiyon Mongunsub Tinimungan Kristian Tumilombus Sumokodung Di Shafie”

Di MONUNUAT PINOOBI
KENINGAU : Piipiro mogiigiyon kampung om lalansanon mogiigiyon id watas diti minongunsub kumaa tinimungan Kristian id posoosorili Sabah montok tumilombus do sumokodung di Shafie Apdal miampai mongundi calon Warisan Plus ontok ko 26tw Kosiam diti.

Tumanud diolo’, sundung pia i Shafie Apdal songulun lalansanon Islam, kowowoyoon i tosonong i pinokito disio kumaa ugama’ suai sotopot kriteria nokuro tu’ isio o pilion bobos tosonong tongo’ mongundi Kristian id pogun diti.

I Pinal Dibal @ Gibal, 57 minoboros do, Komuniti Kristian id pososorili’ pogun okon nopo ko’ momoguno dana montok monuridong toi monginduran gorija nga’ mumang do ugama’ nokomoi kaanu do kopodulionan do tosudong.

Dari kiri, Sianggim Yapangoh, Pinal Dibal dan Lawrence Joseph.

“Komuniti Kristian id Malaysia asaru’ do pongindaraatan di bohogian aiso tinonggungan sabap no do tuduan pulitik om waya mantad ilo’, piipiro gorija id pogun diti nosili sabaagi sasaran ‘molotov cocktail’ om vandalisma ontok di toun 2010 om 2014.

Diskriminasi kumaa Komuniti Kristian kakal po do notilombus om ontok toun diti, songulun Puru Parlimen minoboros do Kitab Injil diti nopesong.

Iyolo i manu sumili Boyoon Montiri id pogun diti kiguno do momuriman do Komuniti Kristian sotopot komuniti i oupus kumaa kotoronongon nga mumang iyolo kapanamangan tosudong soira do pokokoroon o ugama diti.

Bishop Cornelius Piong bersama Shafie Apdal di Bingkor baru-baru ini.

Mantad do pomusarahanku, Shafie Apdal nokopoindalan karaja disio tososonong sabaagi Boyoon Montiri miampai ponginsomokan ‘rendah diri om osuau kumaa Komuniti Kristian’ id pogun diti om lolobi nogi katama isio do manambalas kointalangan do Kitab Injil dilo’ nopesong, naamot di tongo calon Boyoon Montiri miagal di Bung Mokthar Radin om i Hajiji Mohd Noor amu’ momoduli’ id kokomoi ahal dilo nga pakadaada nogi,” ka disio.

Naamot dilo, i Sianggim Yapangoh, 76 mantad Kg. Nuntunan, Apin-Apin kipomusarahan do mesej pisompuruan id pogialatan tinaru om mogisuusuai ugama i maan potonomo,’ di Shafie Apdal id Sabah kiguno do owiton id Semenanjung Malaysia.

“Sabaagi do rakan kongsi i miniampai do minonuridong Pisompuruan Malaysia, Sabah kikosiwatan montok mogowit mesej pisompuruan mantad pogun kumaa id nayatan Nasional maya’ WarisanPlus.

I Lawrence Joseph, 52 i po nogi’ Molohingon Kampung Kg. Nuntunan, Apin-Apin kipomusarahan do Star om PBS kiguno do minaganu koutusan tagayo montok tuminongkiad mantad Umno katalib do nopupusan o PRU14.

“Doho nopo pomusarahan kinalaan Upko id ogumu tundikohonon ontok PRU13 om PRU14 okon i ko sabap parti dilo’ amu nodi relevan kumaa mogiigiyon KDM nga sabap Komuniti Kristian id pogun diti kipomusarahan do Upko amu’ nodi kaanu do momusus diolo’ tu kinagasan do Umno.

Ahal Kalimah Allah ontok di toun 2010an pinointopot do sundung po tu bobos no Upko do manantu Komuniti Kristian id pogun diti kaanu kopomodulionan, dominasi Umno i mumang do manantu rentak pulitik Malaysia amu papasaga pinggisaman Upko.

Om mintong kumaa laang mantad Star om PBS lumansan no do kopkiinsianan mantad Umno om Bersatu, tantu’ nopo do koduo-duo parti nokoiyonon amu kaanu kagarasan montok manantu’ konosipan om timpu gulu Komuniti Kristian id pogun diti om atamong loolobi no soira Umno sumokodung ahal Hukum Hudud PAS.”