Bung Pinopoimagon Umno Monongkibai Id Saviavi Tiikon Kinoubasanan

DATUK SERI BUNG MOKHTAR

Di AZIS KHAN

KOTA KINABALU: Monongkibai oh UMNO Sabah id saviavi tikoon kinoubasanan dino nung kaanjul oh pomihian tagazo monigog do sosongian noopo timpu.

Miaga di nosunud do FMT, minoboos ih Poniikon Tinan Pionitan UMNO Sabah, Datuk Seri Bung Moktar Radin, do tiikon nokomoi, kaampai noh ih piigit-igit do bagas UMNO, ih tuminindak do paati.

“Misokodung zikoi miampai do paati di au mipahud miampai do Warisan.

“Id sandad dino, monongkibai oh UMNO Sabah id saviavi tiikon kinoubasanan dino.

“Piangazan montok tiikon ngaavi suvai potontuon do tiinu, poingkuo poh, aiso piangazan montok tiikon di nahantoi do UMNO,” ka disido, miaga di nosunud do portal nokomoi.

Id Pomihian Tagazo Ko-14 (PRU14), minonongkibai oh UMNO Sabah id 14 tiikon Parlimen, iho nopo nga id Kudat, Kota Belud, Sepanggar, Papar, Kimanis, Beaufort, Sipitang, Tenom, Beluran, Kinabatangan, Silam, Libaran, Semporna, om Kalabakan.

UMNO ih minonongkibai sabaagi Barisan Nasional (BN) noboi’an id Kota Belud, Sepanggar, Papar, Tenom, Silam, Semporna om Kalabakan.

Naamot diho, id laman Twitter sanganu disido, pinopoimagon ih Bung, do monongkibai oh paati nokomoi id saviavi tiikon Parlimen ih nahantoi di ontok 2018.

“Nokoponoodo noh do katantuan oh UMNO montok monongkibai id saviavi tiikon Parlimen piniboi’an ontok PRU14 di nakatahib om piipio tiikon ih opiumanan do apatut, doiti noh do okito dotokou do nung kakaal oh UMNO Sabah alaku om kosudong montok momogun Sabah,” ka disido.